२ भदौ, बागलुङ । बागलुङ बजारमा समुदायस्तरमै कोरोना संक्रमण पुष्टि भएपछि बागलुङ नगर क्षेत्रलाई एक साता निषेधाज्ञा जारी गरिएको छ ।
जिल्ला कमाण्ड पोस्ट र सरोकारवालाहरुको बीचको बैठकले आज राती १२ बजेदेखि भदौ ९ गते राती १२ बजेसम्म बागलुङ नगर क्षेत्रलाई एक साताका लागि निषेधाज्ञा जारी गर्ने निर्णय गरेको हो ।
बागलुङ बजारका दुई जना व्यवसायीलाई संक्रमण पुष्टि भएपछि बागलुङ नगरपालिकाले आज (मंगलबार) विहान विपद व्यवस्थापन समितिको बैठक बसि भदौ १० गतेसम्म लकडाउन गर्नको लागि जिल्ला कमाण्ड पोस्टलाई सिफारिस गरेको थियो । जिल्ला कमाण्ड पोस्टको दिउँसो बसेको बैठकले नगर क्षेत्रलाई भदौ ९ गतेसम्म निषेधाज्ञा जारी गर्ने निर्णय गरेको प्रमुख जिल्ला अधिकारी सुरेश न्यौपानेले जानकारी दिनुभयो ।
समुदायस्तरमा कोरोना देखिन थालेपछि सोमबार बागलुङ नगरपालिका–१, २, ३ र ४ ले विज्ञप्ती प्रकाशित गरि वडा भित्र अत्यावश्यक बाहेकका सेवाहरु बन्द गरेको जनाएका थिएभने उद्योग बाणिज्य संघले बजार क्षेत्रलाई भदौ ७ गतेसम्म लकडाउन गर्ने घोषणा गरेको थियो ।
